ភ្នំពេញ: មន្ត្រីរាជការកម្ពុជាចំនួន ៣០រូប នឹងធ្វើដំណើរទៅកាន់សាធារណរដ្ឋកូរ៉េក្នុងខែនេះ ក្រោមកម្មវិធីអាហារូបករណ៍របស់ទីភ្នាក់ងារសហប្រតិបត្តិការអន្តរជាតិកូរ៉េ (KOICA) ដើម្បីពង្រឹងសមត្ថភាពលើការកែទម្រង់វិស័យអប់រំ និងការអភិវឌ្ឍប្រព័ន្ធដឹកជញ្ជូន និងភស្តុភារឆ្លងដែន ដែលជាវិស័យអាទិភាពស្របតាមយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា។
មន្ត្រីទាំងនេះ មកពីក្រសួងអប់រំ យុវជន និងកីឡា និងក្រសួងសាធារណការ និងដឹកជញ្ជូន បានចូលរួមកម្មវិធីតម្រង់ទិសមុនពេលចេញដំណើរ (Pre-Departure Orientation) ដែលរៀបចំដោយការិយាល័យ KOICA ប្រចាំកម្ពុជា នៅរាជធានីភ្នំពេញ កាលពីថ្ងៃទី៨ ខែកក្កដា មុនពេលចេញដំណើរទៅចូលរួមវគ្គបណ្តុះបណ្តាលឯកទេសនៅសាធារណរដ្ឋកូរ៉េ។
កម្មវិធីនេះ គឺជាផ្នែកមួយនៃកម្មវិធី KOICA Fellowship Program (CIAT) ឆ្នាំ២០២៦ ដែលមានគោលបំណងចែករំលែកបទពិសោធន៍អភិវឌ្ឍន៍ និងជំនាញបច្ចេកទេសរបស់សាធារណរដ្ឋកូរ៉េ ដល់មន្ត្រីគោលនយោបាយកម្ពុជា ដើម្បីគាំទ្រដល់ការអនុវត្តកំណែទម្រង់ និងការអភិវឌ្ឍស្ថាប័នរដ្ឋ។
ក្នុងចំណោមអ្នកចូលរួមទាំង ៣០រូប មានមន្ត្រី ១៥រូប មកពីក្រសួងអប់រំ យុវជន និងកីឡា ដែលនឹងចូលរួមកម្មវិធីបណ្តុះបណ្តាលក្រោមប្រធានបទ «ការពង្រឹងសមត្ថភាពគ្រូបង្រៀនលើការផ្សារភ្ជាប់កម្មវិធីសិក្សា និងការវាយតម្លៃ ដើម្បីលើកកម្ពស់ការវាយតម្លៃសិក្សារបស់សិស្សនៅកម្ពុជា»។
វគ្គបណ្តុះបណ្តាលនេះ ផ្តោតលើការកែទម្រង់កម្មវិធីសិក្សា ការអប់រំផ្អែកលើសមត្ថភាព ប្រព័ន្ធវាយតម្លៃសិស្ស ស្តង់ដារវិជ្ជាជីវៈគ្រូបង្រៀន ព្រមទាំងការបញ្ចូលបច្ចេកវិទ្យាឌីជីថល និងបញ្ញាសិប្បនិម្មិត (AI) ទៅក្នុងការបង្រៀន និងការរៀនសូត្រ។
KOICA បានឱ្យដឹងថា កម្មវិធីនេះគាំទ្រដល់កំណែទម្រង់វិស័យអប់រំរបស់កម្ពុជា និងរួមចំណែកអនុវត្តយុទ្ធសាស្ត្របញ្ចកោណ–ដំណាក់កាលទី១ ជាពិសេសបញ្ចកោណទី១ ស្តីពីការអភិវឌ្ឍមូលធនមនុស្ស តាមរយៈការលើកកម្ពស់គុណភាព ភាពពាក់ព័ន្ធ និងបរិយាបន្ននៃប្រព័ន្ធអប់រំ ដើម្បីកសាងធនធានមនុស្សដែលត្រៀមខ្លួនសម្រាប់អនាគត។
ដោយឡែក មន្ត្រី ១៥រូប មកពីក្រសួងសាធារណការ និងដឹកជញ្ជូន នឹងចូលរួមកម្មវិធីបណ្តុះបណ្តាលក្រោមប្រធានបទ «ការពង្រឹងសមត្ថភាពដើម្បីលើកកម្ពស់ភាពប្រកួតប្រជែងផ្នែកដឹកជញ្ជូន និងភស្តុភារនៅច្រកព្រំដែនកម្ពុជា–វៀតណាម និងកម្ពុជា–ថៃ តាមរយៈការកែលម្អហេដ្ឋារចនាសម្ព័ន្ធ និងបរិក្ខារឆ្លងដែននៅកម្ពុជា»។
កម្មវិធីនេះ មានគោលបំណងពង្រឹងសមត្ថភាពស្ថាប័នលើការរៀបចំផែនការដឹកជញ្ជូន ការគ្រប់គ្រងភស្តុភារ និងការអភិវឌ្ឍហេដ្ឋារចនាសម្ព័ន្ធឆ្លងដែន ដើម្បីគាំទ្រដល់ការសម្រួលពាណិជ្ជកម្ម ការតភ្ជាប់តំបន់ ការបង្កើនប្រសិទ្ធភាពខ្សែសង្វាក់ផ្គត់ផ្គង់ និងការលើកកម្ពស់សមត្ថភាពប្រកួតប្រជែងរបស់កម្ពុជាក្នុងទីផ្សារតំបន់ និងពិភពលោក។
KOICA បានបញ្ជាក់ថា កម្មវិធីនេះស្របតាមបញ្ចកោណទី២ នៃយុទ្ធសាស្ត្របញ្ចកោណ ដែលផ្តោតលើការធ្វើពិពិធកម្មសេដ្ឋកិច្ច និងការបង្កើនភាពប្រកួតប្រជែងរបស់កម្ពុជា។
នៅក្នុងពិធីបើកកម្មវិធីតម្រង់ទិស លោកស្រី Lee Sejin អនុប្រធានការិយាល័យ KOICA ប្រចាំកម្ពុជា បានអបអរសាទរដល់មន្ត្រីដែលត្រូវបានជ្រើសរើស និងបានគូសបញ្ជាក់ពីសារៈសំខាន់នៃការអភិវឌ្ឍសមត្ថភាពធនធានមនុស្ស ក្នុងការគាំទ្រដល់ការអភិវឌ្ឍប្រកបដោយចីរភាពរបស់កម្ពុជា។
លោកស្រីបានបញ្ជាក់ជាថ្មីពីការប្តេជ្ញាចិត្តរបស់ KOICA ក្នុងការគាំទ្រការពង្រឹងធនធានមនុស្សនៅកម្ពុជា តាមរយៈកិច្ចសហប្រតិបត្តិការអន្តរជាតិ ការចែករំលែកចំណេះដឹង និងភាពជាដៃគូរយៈពេលវែង។
ក្នុងអំឡុងកម្មវិធីតម្រង់ទិស សិក្ខាកាមបានទទួលព័ត៌មានអំពីសកម្មភាពកិច្ចសហប្រតិបត្តិការអភិវឌ្ឍន៍របស់ KOICA នៅកម្ពុជា ព្រមទាំងការណែនាំអំពីកម្មវិធីបណ្តុះបណ្តាល និងព័ត៌មានចាំបាច់សម្រាប់ការធ្វើដំណើរ និងការស្នាក់នៅក្នុងសាធារណរដ្ឋកូរ៉េ។
អ្នកចូលរួមក៏ត្រូវបានណែនាំអំពីឱកាសបន្តពង្រីកបណ្តាញវិជ្ជាជីវៈតាមរយៈសមាគមអតីតនិស្សិតកម្ពុជា-កូរ៉េ (CAMKAA) ខណៈវគ្គស្តីពីក្រមប្រតិបត្តិក៏ត្រូវបានរៀបចំឡើង ដោយផ្តោតលើសីលធម៌វិជ្ជាជីវៈ សុចរិតភាព និងការទប់ស្កាត់ការបៀតបៀនគ្រប់ទម្រង់ ដើម្បីលើកកម្ពស់បរិយាកាសសិក្សាប្រកបដោយសុវត្ថិភាព ការគោរពគ្នាទៅវិញទៅមក និងបរិយាបន្ន។
តំណាងក្រសួងទាំងពីរ ក៏បានចែករំលែកអំពីអាទិភាព ការប្រឈម និងផែនការអភិវឌ្ឍន៍របស់ស្ថាប័នរៀងៗខ្លួន ព្រមទាំងបង្ហាញការរំពឹងទុកថា ចំណេះដឹង និងជំនាញដែលទទួលបានពីកម្មវិធីបណ្តុះបណ្តាលនៅសាធារណរដ្ឋកូរ៉េ នឹងអាចយកទៅអនុវត្ត ដើម្បីបង្កើនប្រសិទ្ធភាពការងារ និងពង្រឹងសមត្ថភាពស្ថាប័នរដ្ឋ។
សិក្ខាកាមបានថ្លែងអំណរគុណដល់ KOICA និងរដ្ឋាភិបាលសាធារណរដ្ឋកូរ៉េ ដែលបានផ្តល់ឱកាសនេះ និងបានបង្ហាញការប្តេជ្ញាចិត្តក្នុងការយកចំណេះដឹង និងបទពិសោធន៍ដែលទទួលបាន មកចូលរួមចំណែកក្នុងការអភិវឌ្ឍប្រទេសកម្ពុជា។
តាមរយៈកម្មវិធីអាហារូបករណ៍របស់ខ្លួន KOICA បន្តគាំទ្រដល់ការអភិវឌ្ឍស្ថាប័នរដ្ឋកម្ពុជា តាមរយៈការបណ្តុះបណ្តាលជំនាញសម្រាប់មន្ត្រីរាជការ និងការពង្រឹងភាពជាដៃគូរយៈពេលវែងរវាងកម្ពុជា និងសាធារណរដ្ឋកូរ៉េ ក្នុងវិស័យអាទិភាពនានា។
