សមាគមទេសចរណ៍អាស៊ីប៉ាស៊ីហ្វិកប្រចាំកម្ពុជា (PATACC) សហការជាមួយសហព័ន្ធទេសចរណ៍កម្ពុជា ក្រោមការគាំទ្រពីក្រសួងទេសចរណ៍, ក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា (CTB) និងសភាពាណិជ្ជកម្មឥណ្ឌានៅកម្ពុជា(ICC) នឹងរៀបចំកម្មវិធី Cambodia Travel Match (CTM) 2026 នៅក្នុងខែកក្កដានេះ។
នេះជាកម្មវិធីពិសេសសម្រាប់ទីផ្សារឥណ្ឌា (India Special Edition) ដោយរំពឹងថានឹងទទួលបានជោគជ័យបន្ថែមទៀត ដើម្បីរួមគ្នានាំកម្ពុជាទៅកាន់ពិភពលោក។ កម្មវិធីនេះនឹងធ្វើនៅខេត្តសៀមរាប នាថ្ងៃទី១៨ ខែកក្កដា និងនៅភ្នំពេញនាថ្ងៃទី ២០ ខែកក្កដា ឆ្នាំ២០២៦។
Cambodia Travel Match 2026 – India Special Edition មានគោលបំណងបង្កើនភ្ញៀវទេសចរអន្តរជាតិមកកម្ពុជា, បង្កើតកិច្ចព្រមព្រៀងអាជីវកម្មថ្មី, បង្កើនការផ្សព្វផ្សាយគោលដៅទេសចរណ៍កម្ពុជា, បង្កើនការវិនិយោគក្នុងវិស័យទេសចរណ៍ និងពង្រឹងភាពជាដៃគូរវាងផ្នែករដ្ឋ និងឯកជន។
តាមការគ្រោងទុកកម្មវិធីនេះនឹងមានការចូលរួមពីអ្នកនៅក្នុងវិស័យសណ្ឋាគារ រមណីយដ្ឋាន ក្រុមហ៊ុនទេសចរណ៍, ភ្នាក់ងារទេសចរណ៍, ភោជនីយដ្ឋាន ក្រុមហ៊ុនដឹកជញ្ជូន វិនិយោគិន និងម្ចាស់អាជីវកម្មពាក់ព័ន្ធទេសចរណ៍ជាដើម។
អ្នករៀបចំកម្មវិធី CTM 2026 លើកឡើងថា៖«CTM មិនមែនជាពិព័រណ៍ទេសចរណ៍ធម្មតាទេ ប៉ុន្តែជាវេទិកាទីផ្សារទេសចរណ៍ថ្នាក់ជាតិ(National Destination Marketing Platform) ដែលត្រូវបានបង្កើតឡើងដើម្បីភ្ជាប់អាជីវកម្មទេសចរណ៍កម្ពុជាជាមួយអ្នកទិញ (Hosted Buyers) មកពីទីផ្សារអន្តរជាតិ និងបង្កើតឱកាសអាជីវកម្មរយៈពេលវែង»។
សម្រាប់កម្មវិធីលើកនេះ CTM ត្រៀមស្វាគមន៍អ្នកទិញអន្តរជាតិ (Hosted Buyers) និងសារព័ត៌មានទេសចរណ៍ជាន់ខ្ពស់ពីប្រទេសឥណ្ឌា ដែលជាទីផ្សារទេសចរណ៍កំពុងរីកលូតលាស់លឿនបំផុតមួយរបស់ពិភពលោក។ នេះក៏ជាឱកាសដ៏មានតម្លៃរបស់វិនិយោគិន ស្ថាប័ន និងម្ចាស់អាជីវកម្មពាក់ព័ន្ធទេសចរណ៍ទាំងអស់ក្នុងការបង្ហាញផលិតផល និងសេវាកម្មរបស់ខ្លួនដោយផ្ទាល់ទៅកាន់អ្នកសម្រេចចិត្តទិញ(Decision Makers)។
តាមរយៈជំនួបផ្ទាល់នៅក្នុងកម្មវិធី CTM គឺវាអាចជាចំណុចចាប់ផ្តើមនៃការស្គាល់គ្នា ការទំនាក់ទំនង ការជឿទុកចិត្ត មិត្តភាព ភាពជាដៃគូ និងកិច្ចព្រមព្រៀងអាជីវកម្មរយៈពេលវែងរបស់គ្រប់ភាគីពាក់ព័ន្ធទាំងអស់ ដែលបានចូលរួម ហើយនេះជាទស្សនវិស័យដែល CTM កំពុងកសាងសម្រាប់វិស័យទេសចរណ៍កម្ពុជា។
ការចូលរួមក្នុងកម្មវិធី CTM បានអនុញ្ញាតឱ្យម្ចាស់អាជីវកម្ម បានជួប HostBuyers ដោយផ្ទាល់ ព្រមទាំងបានផ្សព្វផ្សាយផលិតផលទៅទីផ្សារអន្តរជាតិ បង្កើតដៃគូអាជីវកម្មថ្មី បង្កើនឱកាសនាំភ្ញៀវមកកម្ពុជា ពង្រីកបណ្ដាញទំនាក់ទំនងជាមួយអន្តរជាតិ បង្ហាញម៉ាកយីហោរបស់ខ្លួន នៅលើវេទិកាជាតិ។ ចំណែកការឧបត្ថម្ភដល់ CTM មិនមែនគ្រាន់តែជាការផ្សព្វផ្សាយម៉ាកប៉ុណ្ណោះទេ ប៉ុន្តែវាជាការវិនិយោគក្នុងការអភិវឌ្ឍវិស័យទេសចរណ៍ជាតិ និងការកសាងអនាគតសេដ្ឋកិច្ចរបស់កម្ពុជា។
អ្នករៀបចំកម្មវិធី CTM បានបញ្ជាក់ថា៖ «នៅក្នុងបរិបទដែលវិស័យទេសចរណ៍ពិភពលោក កំពុងប្រកួតប្រជែងយ៉ាងខ្លាំង កម្ពុជាត្រូវការការចូលរួមពីគ្រប់ភាគី ហើយ CTM គឺជាវេទិការួមរបស់យើងទាំងអស់គ្នា។ ជោគជ័យរបស់ CTM គឺជាជោគជ័យរបស់វិស័យទេសចរណ៍កម្ពុជា ដោយយើងរួមគ្នានាំកម្ពុជាទៅកាន់ពិភពលោក»។
គិតចាប់តាំងពីការដាក់ឱ្យដំណើរការជាផ្លូវការ នៅខែមីនា ឆ្នាំ២០២៦ ព្រឹត្តិការណ៍ CTM ទទួលបានជោគជ័យក្នុងកិច្ចស្វាគមន៍ប្រតិភូដែលជាអ្នកទិញអន្តរជាតិ (Hosted Buyers) ចំនួន ៨០ស្ថាប័ន ពីទីផ្សារគោលដៅចំនួន ៧ ដោយសម្រេចបាននូវទំហំពាណិជ្ជកម្មដែលអាចវាស់វែងបានយ៉ាងច្បាស់លាស់។ សមិទ្ធផល លេចធ្លោរួមមាន កំណើនទេសចរមកពីវៀតណាម ការពង្រីកទីផ្សារថ្មីពីឥណ្ឌូនេស៊ី សក្តានុពលទេសចរណ៍វាយកូនហ្គោលពីសិង្ហបុរី ការតភ្ជាប់កញ្ចប់ទស្សនកិច្ចពីមីយ៉ាន់ម៉ា និងការរក្សាបាននូវកំណើនពាណិជ្ជកម្មរឹងមាំជាមួយទីផ្សារចិន។
កាលពីឆ្នាំ២០២៥ ចំនួនភ្ញៀវទេសចរឥណ្ឌាមកកម្សាន្តនៅកម្ពុជា មានចំនួន ៧១ ០៤៦នាក់ ធ្លាក់ចុះ ៨,៥% បើធៀបនឹងឆ្នាំ២០២៤។ ដោយឡែកសម្រាប់រយៈពេល ៥ខែដើមឆ្នាំ២០២៦ ភ្ញៀវទេសចរឥណ្ឌា មានចំនួន ២៦ ២៧៣នាក់ ធ្លាក់ចុះ ១៤,៦% បើធៀបរយៈពេលដូចគ្នាកាលពីឆ្នាំ២០២៥។ នេះបើតាមទិន្នន័យក្រសួងទេសចរណ៍៕
