ខេត្ដកោះកុង៖ ក្រសួងព័ត៌មានបានជំរុញឱ្យមន្ទីរព័ត៌មានរាជធានី-ខេត្ត ពង្រឹងតួនាទីជា «ខ្សែប្រយុទ្ធ» ក្នុងសមរភូមិព័ត៌មាននៅមូលដ្ឋាន ដោយត្រូវក្តាប់សភាពការណ៍ជាតិ និងអន្តរជាតិឱ្យបានច្បាស់លាស់ និងត្រៀមព័ត៌មានពិតឱ្យបានគ្រប់គ្រាន់ ដើម្បីឆ្លើយតបព័ត៌មានក្លែងក្លាយបានលឿន មុនការភាន់ច្រឡំរីករាលដាលក្នុងសាធារណមតិ។
ការជំរុញនេះធ្វើឡើងដោយលោក ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន ក្នុងពិធីជួបសំណេះសំណាល និងតម្រង់ទិសការងារគ្រប់គ្រងព័ត៌មាន និងសាធារណមតិ ចំពោះមន្ត្រីរាជការនៃមន្ទីរព័ត៌មានខេត្តកោះកុង កាលពីថ្ងៃទី១៣ ខែកក្កដា។
លោកបានណែនាំមន្ត្រីព័ត៌មានរាជធានី-ខេត្ត ឱ្យតាមដាន និងក្តាប់ព័ត៌មាន ព្រមទាំងព្រឹត្តិការណ៍ជាតិ និងអន្តរជាតិឱ្យបានច្បាស់លាស់ ដើម្បីអាចរៀបចំយុទ្ធសាស្ត្រផ្សព្វផ្សាយព័ត៌មានត្រឹមត្រូវទៅកាន់ប្រជាពលរដ្ឋនៅមូលដ្ឋាន ប្រកបដោយប្រសិទ្ធភាព។
បើតាមលោក ការផ្តល់ព័ត៌មានពិត ច្បាស់លាស់ និងទាន់ពេលវេលា នឹងជួយបង្ការកុំឱ្យប្រជាពលរដ្ឋទទួលព័ត៌មានមិនពិត ឬមានការបកស្រាយខុសតាមរយៈប្រភពព័ត៌មានផ្សេងៗ។
ក្នុងបរិបទបច្ចេកវិទ្យាដែលកំពុងវិវត្តយ៉ាងឆាប់រហ័ស លោក អស្នារិទ្ធ បានកត់សម្គាល់ថា លំហូរព័ត៌មានក្លែងក្លាយក៏កើតមានកាន់តែច្រើន ដែលទាមទារឱ្យមន្ត្រីព័ត៌មានបង្កើនការប្រុងប្រយ័ត្ន និងមានវិធានការគ្រប់គ្រង និងឆ្លើយតបព័ត៌មានឱ្យបានម៉ឺងម៉ាត់។
លោកបានលើកឡើងថា៖ «វិធីសាស្ត្រប្រឆាំងដ៏មានប្រសិទ្ធភាព គឺការយកព័ត៌មានពិតទៅបំផ្លាញព័ត៌មានក្លែងក្លាយឱ្យអស់»។
លោកបានសង្កត់ធ្ងន់ថា នៅពេលមន្ត្រីទទួលបន្ទុកការងារសាធារណមតិមានធាតុចូល និងព័ត៌មានគ្រប់គ្រាន់ ពួកគេអាចឆ្លើយតបបានភ្លាមៗ និងផ្អែកលើមូលដ្ឋានព័ត៌មានត្រឹមត្រូវ។
ការឆ្លើយតបឱ្យបានលឿន និងច្បាស់លាស់ អាចជួយកាត់បន្ថយការភាន់ច្រឡំរបស់សាធារណជន និងទប់ស្កាត់ការបំភ្លៃការពិតអំពីស្ថានភាពកម្ពុជា ពីមតិអវិជ្ជមាននៅក្រៅប្រទេស ឬក្រុមមជ្ឈដ្ឋានដែលលោកចាត់ទុកថាមានចេតនាមិនល្អ ជាពិសេសចំពោះបញ្ហាដែលកើតមាននៅមូលដ្ឋាន។
ការណែនាំនេះធ្វើឡើងស្របពេលក្រសួងព័ត៌មានកំពុងពង្រីកយុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី២ ទៅកាន់រាជធានី-ខេត្តនានា ដោយផ្តោតលើការពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយ ដើម្បីបង្កើនសុវត្ថិភាពព័ត៌មាន។
ក្រសួងបានអះអាងនាពេលថ្មីៗនេះថា អ្នកប្រើប្រាស់បណ្តាញសង្គម ជាពិសេសយុវជន កំពុងបង្កើនការប្រុងប្រយ័ត្ន និងផ្ទៀងផ្ទាត់ព័ត៌មានជាមួយប្រភពផ្លូវការ មុនចែករំលែកបន្ត ដែលត្រូវបានចាត់ទុកថាជាការផ្លាស់ប្តូរឥរិយាបថសំខាន់ក្នុងការទប់ស្កាត់ការរីករាលដាលព័ត៌មានមិនពិត។
លោក អស្នារិទ្ធ បានចាត់ទុកមន្ទីរព័ត៌មានថា ជា «ស្ពានតភ្ជាប់ដ៏សំខាន់» រវាងរាជរដ្ឋាភិបាល និងប្រជាពលរដ្ឋ តាមរយៈការងារព័ត៌មាន និងសាធារណមតិ ដែលជាយន្តការមិនអាចខ្វះបានទាំងនៅថ្នាក់រដ្ឋបាលរាជធានី-ខេត្ត និងថ្នាក់ជាតិ។
លោកបញ្ជាក់ថា យន្តការការងារព័ត៌មាន និងសាធារណមតិនៃមន្ទីររាជធានី-ខេត្ត កំពុងដើរតួនាទីជា «ខ្សែប្រយុទ្ធ» ក្នុងសមរភូមិព័ត៌មានសម្រាប់មូលដ្ឋានរៀងៗខ្លួន។
ទោះយ៉ាងណា លោកបានសង្កត់ធ្ងន់ថា ដើម្បីធានាប្រសិទ្ធភាពការងារ ក្រុមការងារត្រូវមានការគាំទ្រ និងសហការគ្នាជាធ្លុងមួយ ពង្រឹងសាមគ្គីភាពផ្ទៃក្នុង និងបង្កើនកិច្ចសហការជាមួយមន្ទីរជំនាញជុំវិញខេត្ត ព្រមទាំងអាជ្ញាធរគ្រប់ជាន់ថ្នាក់។
លោកបានជំរុញឱ្យបង្កើតបណ្តាញការងារព័ត៌មាន និងសាធារណមតិដ៏រឹងមាំនៅមូលដ្ឋាន ដើម្បីធានាថា នៅពេលកើតមានព័ត៌មានមិនពិត ឬបញ្ហាដែលបង្កការភាន់ច្រឡំ អង្គភាពពាក់ព័ន្ធអាចប្រមូលព័ត៌មាន និងឆ្លើយតបបានទាន់ពេលវេលា។
ជាមួយគ្នានេះ អ្នកនាំពាក្យក្រសួងព័ត៌មានក៏បានជំរុញឱ្យមន្ទីរព័ត៌មានរាជធានី-ខេត្ត បង្កើនការផលិត និងផ្សព្វផ្សាយព័ត៌មានអំពីសកម្មភាពថ្នាក់ដឹកនាំ ការអភិវឌ្ឍមូលដ្ឋាន និងព្រឹត្តិការណ៍នានាក្នុងខេត្ត តាមរយៈគេហទំព័រ និងបណ្តាញសង្គមផ្លូវការរបស់ខ្លួន។
លោក មុំ ម៉ាលិកា ប្រធានមន្ទីរព័ត៌មានខេត្តកោះកុង បានប្តេជ្ញាពង្រឹងសមត្ថភាពក្រុមការងារ និងបង្កើនការប្រើប្រាស់បច្ចេកវិទ្យាឌីជីថល ដើម្បីជំរុញការផលិតមាតិកាព័ត៌មានអំពីសកម្មភាពថ្នាក់ដឹកនាំ និងសមិទ្ធផលអភិវឌ្ឍន៍នៅមូលដ្ឋានឱ្យកាន់តែសកម្ម និងទាន់ពេលវេលា។
លោកបន្តថា មន្ទីរនឹងពង្រឹងប្រសិទ្ធភាពបណ្តាញសង្គមផ្លូវការរបស់ខ្លួន ដើម្បីឱ្យក្លាយជាប្រភពព័ត៌មានដែលប្រជាពលរដ្ឋនៅទូទាំងខេត្តកោះកុងអាចទុកចិត្តបាន៕
